Էրդողանը դեմ է Ֆինլանդիայի և Շվեդիայի՝ ՆԱՏՕ-ին անդամակցելուն

Թուրքիայի նախագահ Ռեջեփ Թայիփ Էրդողանը ուրբաթ հայտարարել է, որ իր երկիրը, որը ՆԱՏՕ-ի անդամ է, չի կարող դրական գնահատել Շվեդիայի և Ֆինլանդիայի՝ դաշինքին միանալու ծրագրերը։ Այս մասին գրում է Daily Sabah-ը։

«Մենք դրա վերաբերյալ դրական կարծիք չունենք: Սկանդինավյան երկրները նման են ահաբեկչական կազմակերպությունների հյուրատան»,- ասել է Էրդողանը` մատնանշելով, որ Թուրքիան կարող է օգտագործել Դաշինքի անդամի կարգավիճակը, որ վետո դնի երկու երկրների անդամակցությանը:

Միաժամանակ, Թուրքիայի նախագահը նկատի ուներ Քուրդիստանի աշխատավորական կուսակցության անդամներին, որոնք ապաստան են գտել սկանդինավյան երկրներում։

Էրդողանն ասել է, որ Թուրքիայի նախկին ղեկավարները «սխալվել են»՝ կանաչ լույս վառելով Հունաստանի՝ ՆԱՏՕ-ին անդամակցելու համար 1952 թվականին:

«Մենք՝ Թուրքիան, չենք ցանկանում երկրորդ սխալ թույլ տալ այս հարցում»,- ասել է նա։

Մայիսի 12-ին Ֆինլանդիայի նախագահ Սաուլի Նիինիստեն և վարչապետ Սաննա Մարինը պաշտոնապես հայտարարեցին, որ սատարում են երկրի անդամակցությանը ՆԱՏՕ-ին։