Ադրբեջանի Միլի մեջլիսն առաջարկում է ստեղծել Հայաստանի հետ հարաբերությունների հանձնաժողով

Ադրբեջանի Միլի մեջլիսի այսօրվա նիստում պատգամավոր Ֆազիլ Մուստաֆան առաջարկել է ստեղծել Հայաստանի հետ հարաբերությունների հանձնաժողով։

Ադրբեջանցի պատգամավորի խոսքով՝ «հայերն իրենք արդեն խոստովանում են, որ առանց Ադրբեջանի հետ խաղաղության պայմանագիր կնքելու Հայաստանը չի կարող զարգանալ, և Ադրբեջանը պետք է օգտվի դրանից» (նկատի ունի Փաշինյանի ու նրա հակահայ վարչախմբի հայտարարությունները):

«Մենք պետք է ակտիվացնենք մեր աշխատանքը Հայաստանի խորհրդարանի հետ։ Խորհրդարանում այս ուղղությամբ հանձնաժողով ստեղծելու անհրաժեշտություն կա։ ԱՊՀ տարածքում մենք Հայաստանի հետ գործում ենք 5 հարթակներում. ոչ կառավարական կազմակերպությունները պետք է ակտիվացնեն նախագծերը Հայաստանում ՈԿԿ-ների հետ, առաջարկներ ներկայացնեն հանրությանը։ Մենք պետք է սկսենք աշխատել հայ հասարակության հետ՝ առանց միջնորդների»,- ասել է Մուստաֆան: