Հանրային խորհուրդն առաջարկում է ստեղծել Սևանի աղտոտման խնդրով զբաղվող միջգերատեսչական հանձնաժողով

Հանրային խորհուրդն առաջարկում է ստեղծել ՀՀ վարչապետին առընթեր Սևանա լճի աղտոտման խնդրով զբաղվող միջգերատեսչական հանձնաժողով: Այս մասին հուլիսի 25-ին տեղի ունեցած քննարկման ընթացքում հայտնեց խորհրդի նախագահ Վազգեն Մանուկյանը:

«Հայջրնախագիծ» ինստիտուտի տնօրեն Յուրի Ջավադյանն էլ իր հերթին նշեց, որ ջրի աղտոտումը պայմանավորված է մի քանի պատճառներով:

«Սևանա լճում ծաղկել են ջրիմուռները, որովհետև ազգովի աղտոտում ենք Սևանն, առանց հաշվի առնելու, որ մեզ համար շատ գնահատված բնության հրաշալիք է: Բավական մեծ չափերի է հասնում ափերում տեղակայված 2400 կազմակերպություններից, որոնց մեջ հյուրանոցներ են, հանգստի տներ, ռեստորաններ, որոնցից 300-ը մշտական գործող են, դրանց կողմից աղտոտումը: Որոշել ենք այդ հաստատությունների հաշվին մաքրման կայաններ տեղադրել նշված վայրերում»,- ասաց նա:

Նրա խոսքով` Ճապոնիայից բերվել է ցեոլիտ նյութը, որով այնտեղ պայքարում են ջրիմուռների ծաղկման դեմ, այժմ ընթանում են այդ նյութի փորձարկումները:

«Այստեղ այդ նյութերի մեծ արտադրություն ունենք: Սկսել ենք այդ նյութերի փորձարկումները, թե ինչ ազդեցություն կունենա կենդանական աշխարհի վրա»,- նշեց Ջավադյանը:

ՀՀ շրջակա միջավայրի նախարարության Ջրային ռեսուրսների կառավարման գործակալությանպետ Էդգար Փիրումյանն ընդգծեց, որ իրենց իրականացված վերջին հետազոտությունները ցույց են տվել, որ ներկայումս ջրիմուռների ծաղկումն ավարտված է:

«Ջրիմուռների ծաղկումն ավարտված է. դա վկայում է այն, որ 20 մետր խորության վրա ֆոսֆորի առկայություն չի արձանագրվել»,- նշեց Փիրումյանը:

Նրա խոսքով` Սևանա լճի արտասովոր գույնը պայմանավորված է նրանով, որ ջրիմուռների ծաղկման շրջանից հետո անջատվում է կալցիում, որը ածխաթթու գազի հետ շփումից հետո տալիս է այդ պղտոր գույնը: