Թուրքատյացությունն ու ադրբեջանատյացությունը հայկականության հետ կապ չունեն. Գուրգեն Արսենյան

Ի՞նչ եք պատկերացնում, երբ ասում ենք հայկականություն, սա վերջին հարյուր տարվա ամենագլոբալ խնդի՞րն է։ Այս մասին ԱԺ ելույթում ասաց իշխող խմբակցության պատգամավոր Գուրգեն Արսենյանը։

«Հայկականության հիմնական դրսևորումը հայկական քաղաքական համակարգերում և Սփյուռքում, չգիտես ինչու, թուրքատյացությունն ու ադրբեջանատյացությունն է եղել։ Իմ խոր պատկերացմամբ՝ դա որևէ կապ չունի հայկականության հետ, հայկականությունը լրիվ այլ կոմպլեքս է, դա Հայաստանը ներդրումային երկիր դարձնելու ծրագիր է, դա հարևանների հետ կայուն և սպառնալիքների չեզոքացմանն ուղղված հարաբերությունների կառուցում է, գիտական բաղադրիչների խթանում, հարևանների հետ կայուն խաղաղության ապահովում, ինտեգրացիոն սխեմաների մշակում է և այլն։ Հայկականության մեջ պետք է լինի ատելության էլեմենտը, որը ոչ թե պետք է ուղղված լինի որևէ ազգի, այլ տգիտությանը և լկտիությանը»,- ասաց Արսենյանը։

Նա նշեց, որ ՀՀ ղեկավարության կողմից տարվող խաղաղության օրակարգի կոնցեպտի շահառուն ՀՀ-ի և Արցախի ժողովուրդն է։