Խնդիրը խաղողի մթերման գնի հետ է կապված. Աշոտ Արսենյան

Այս գյուղատնտեսական տարին աչքի ընկավ մթերումների հետ կապված խնդրով: Այս օրերին նույն այդ խնդրի առաջ են կանգնել Վայոց ձորի մարզի Աղավնաձոր գյուղի բնակիչները. նրանք բողոքում են, որ չեն կարողանում մթերել խաղողը:

Yerkir.am-ի հետ զրույցում այդ ընտրատարածքից մեծամասնական ընտրակարգով ընտրված ՀՀԿ-ական պատգամավոր Աշոտ Արսենյանը հավաստիացրեց, որ խնդիրը ոչ թե մթերման հետ է կապված, այլ մթերման գնի: Նա նախ նշեց, որ արդեն կան պայմանավորվածություններ` խաղողը սկսել են մթերել:

Հարցին, թե ինչո՞ւ են այդ դեպքում գյուղացիները բողոքում և սպառնում անգամ կտրուկ քայլերի դիմել, Աշոտ Արսենյանը պատասխանեց. «Չգիտեմ` ինչու են բողոքում, երևի մթերման գնի հետ է կապված: Իհարկե, լավ կլիներ, որ բարձր գնով մթերեին գյուղացիների խաղողը, բայց շուկայական հարաբերություններ կան` շուկան է գինը թելադրում: Խնդիրը միայն մթերման գնի հետ է կապված»:

Պատգամավորը հավաստիացրեց, որ խնդիրն իր ուշադրության կենտրոնում է: «Ես հետևում եմ, կապի մեջ եմ ինչպես մարզպետի, այնպես էլ գյուղացիների հետ»,- ասաց նա: