Պենտագոնը կօգնի հավաքել ապացույցներ Ուկրաինայում ռուսական «ռազմական հանցագործությունների մասին»

Պենտագոնը մեղադրել է ռուսական ուժերին Ուկրաինայում ռազմական հանցագործություններ կատարելու մեջ և ասել, որ կօգնի ապացույցներ հավաքել, քանի որ Կրեմլը հարձակումներ է իրականացնում՝ որպես պատերազմի կանխամտածված ռազմավարության մաս: Այս մասին գրում է Reuters-ը։

«Մենք, անշուշտ, տեսնում ենք հստակ ապացույցներ, որ ռուսական զորքերը ռազմական հանցագործություններ են կատարում, և մենք օգնում ենք դրա ապացույցները հավաքել»,- ճեպազրույցում ասել է Պենտագոնի խոսնակ Ջոն Քիրբին:

«Բայց կան հետաքննական գործընթացներ, որոնք կշարունակվեն, և մենք պատրաստվում ենք նպաստել այս հետաքննության գործընթացին: Թե դրանից ինչ դուրս կգա, դա Պենտագոնի ղեկավարության որոշելիքը չէ»,- նշել է նա:

38 երկրներ պաշտոնապես Միջազգային քրեական դատարան են ներկայացրել Ուկրաինայում «Ռուսաստանի կատարած վայրագությունների մասին» զեկույցներ։

Փետրվարի 28-ին Հաագայի միջազգային քրեական դատարանի դատախազ Քարիմ Խանը հայտարարել էր, որ որոշել է հետաքննություն սկսել Ուկրաինայում տիրող իրավիճակի վերաբերյալ։