Պատմությունից դաս չքաղելուց կրկնվում են տառապանքները. Էրդողանը` ՀՀ ԱԳՆ մասնակցությամբ ֆորումին

Երեկ Թուրքիայի Անթալիա քաղաքում մեկնարկել է Անթալիայի Միջազգային դիվանագիտական ֆորումը, որին այս տարի, Թուրքիայի հետ «խաղաղասիրական» նկրտումներից ելնելով, մասնակցում է նաև Հայաստանից պատվիրակություն՝ ՀՀ ԱԳՆ ղեկավար Արարատ Միրզոյանի գլխավորությամբ։

Ֆորումի ընթացքում ելույթ է ունեցել նաև Թուրքիայի ղեկավար Ռեջեփ Թայիփ Էրդողանը. մոտ 25 րոպե տևողությամբ ելույթը մեծ մասամբ նվիրված է եղել Ուկրաինայում հակամարտությանը։

«Պատմությունը կրկնվում է նրանց համար, ովքեր պատմությունից դասեր չեն քաղում։ Պատմությունից դաս չքաղելուց կրկնվում է ոչ միայն պատտմությունը, այլև տառապանքը։ Ուկրաինան այդ ճշմարտության վառ օրինակն է», - հայտարարել է Էրդողանը։

Այս խոսքերն ուղղված էին ոչ միայն միջազգային դերակատարներին, այլև Թուրքիայի հետ որոշակի հակամարտության մեջ գտնվող երկրներին և հարևաններին։

Էրդողանը բազմիցս հայտարարել է, որ Հայաստանը «պետք է դասեր քաղի պատմությունից և խելքի գա»: «Հայաստանը պետք է խելքի գա: Հայ քաղաքական գործիչները, հայկական սփյուռքը դատապարտել են իրենց ժողովրդին դժբախտության: Եթե հայ ժողովուրդը կարողանա դասեր քաղել ղարաբաղյան պատերազմից, տարածաշրջանում նոր դարաշրջան կսկսվի», - դեռևս 2020 թ. դեկտեմբերին ասել էր նա։

Հայաստանին ոչինչ չտվող թուրքական այս ֆորումին մասնակցությունը, որի ժամանակ թուրքերը, վստահաբար, հայկական կողմին բազմաթիվ բացասական ակնարկներ անելու առիթը բաց չեն թողնի, անիմաստ և աննպատակ է։

Թուրքիայում նմանատիպ ակնարկներ լսելը և Էրդողանի ելույթից հետո նրան հոտնկայս ծափահարելը և, փաստացի, «սպիտակ դրոշ» պարզելը Հայաստանին ոչինչ չի տալու, իսկ թուրքերը, սովորության համաձայն, երբեք առիթը բաց չեն թողնում հակառակորդներին սեփական «գերազանցության» մասին հիշեցնելու համար։