Կանադան պատժամիջոցներ է սահմանել «Գազպրոմի», «Ռոսնեֆտի», Մեդվեդևի և Միշուստինի դեմ

Կանադան պատժամիջոցներ է կիրառել «Գազպրոմի» և «Ռոսնեֆտի» 10 հիմնական աշխատակիցների և Ռուսաստանի բարձրաստիճան պաշտոնյաների նկատմամբ։ Այս մասին ասվում է Կանադայի արտաքին գործերի նախարարության հայտարարության մեջ։

«Արտաքին գործերի նախարար Մելանի Ժոլին հայտարարել է նոր պատժամիջոցների մասին՝ համաձայն Հատուկ տնտեսական միջոցառումների կանոնակարգի՝ ի պատասխան Ռուսաստանի հրահրած և չարդարացված ներխուժմանը Ուկրաինա: Այս նոր միջոցները սահմանափակումներ են մտցնում Ռուսաստանի էներգետիկ ոլորտի երկու կարևոր ընկերությունների՝ «Ռոսնեֆտի» և «Գազպրոմի» 10 հիմնական ներկայացուցիչների նկատմամբ»,- ասվում է զեկույցում։

Պատժամիջոցների ցուցակում ավելացվել են նաև ՌԴ Անվտանգության խորհրդի փոխնախագահ Դմիտրի Մեդվեդևի, վարչապետ Միխայիլ Միշուստինի, Մոսկվայի քաղաքապետ Սերգեյ Սոբյանինի և Սանկտ Պետերբուրգի նահանգապետ Ալեքսանդր Բեգլովի անունները։