ԱՄՆ-ը դարձյալ հորդորել է իր քաղաքացիներին՝ լքել Ուկրաինան

Ուկրաինայում ամերիկյան դեսպանատունը դարձյալ կոչ է արել իր քաղաքացիներին՝ լքել այդ երկիրը, և առաջարկել է ուղիներ, որոնցով դա հնարավոր է անել։

«Ուկրաինայում անվտանգային իրադրությունը մնում է անկանխատեսելի ռուսական ռազմական գործողությունների սպառնալիքների պատճառով և կարող է վատթարանալ առանց նախազգուշացման։ Ուկրաինայում գտնվող ԱՄՆ քաղաքացիները պետք է մտածեն հիմա հեռանալու մասին՝ օգտվելով առևտրային կամ այլ մասնավոր մեքենաներից»,- ասվում  է հայտարարության մեջ:

Մեկնումներն առաջարկվում են Մոլդովայի, ինչպես նաև ԵՄ երկրների, այդ թվում՝ Լեհաստանի, Սլովակիայի, Հունգարիայի, Ռումինիայի տարածքով:

Ավելի վաղ՝ հունվարի 24-ին, Պետդեպարտամենտը հրամայել էր Կիևում ԱՄՆ դեսպանատան աշխատակիցների ընտանիքներին՝ լքել Ուկրաինան «ռուսական հնարավոր միջամտության» պատճառով, և իր քաղաքացիներին խորհուրդ էր տվել զերծ մնալ երկու հակամարտող երկրներ մեկնելուց։