Իրանը կոչ է արել պատասխանատվության ենթարկել ԱՄՆ-ին և Իսրայելին Սոլեյմանիի սպանության համար

ՄԱԿ-ում Իրանի մշտական ներկայացուցիչ Մաջիդ Թախտ-Ռավանչին կոչ է անում ՄԱԿ-ի Անվտանգության խորհրդին՝ պատասխանատվության ենթարկել ԱՄՆ-ին և Իսրայելին գեներալ Ղասեմ Սոլեյմանիի սպանության համար։ Ռավանչին Անվտանգության խորհրդի նախագահին  նամակ է հղել Սոլեյմանիի սպանության երկրորդ տարելիցի առնչությամբ. հայտնում է «մՌԻԱ Նովոստի»-ն։

Նրա խոսքով՝ Սոլեյմանին նշանակալի դեր է խաղացել միջազգային ահաբեկչության դեմ պայքարում, ուստի նրա սպանությունը «մեծ նվեր» էր ԻՊ-ի և ՄԱԿ-ի Անվտանգության խորհրդի կողմից ահաբեկչական ճանաչված այլ  խմբավորումների համար։

«Հաշվի առնելով այս ահաբեկչական գործողության սարսափելի հետևանքները միջազգային խաղաղության և անվտանգության համար՝ Անվտանգության խորհուրդը պետք է կատարի իր կանոնադրական պարտավորությունները և պատասխանատվության ենթարկի Միացյալ Նահանգներին և Իսրայելի ռեժիմին այս ահաբեկչությունը ծրագրելու, դրան աջակցելու և իրականացնելու համար»,- նշել է Իրանի մշտական ներկայացուցիչը։

Ըստ Ռավանչիի՝ իրանցի զինվորականները վճռական են շարունակել Սոլեյմանիի ուղին՝ ակտիվորեն օգնելով տարածաշրջանի երկրներին և կառավարություններին, համաձայն նրանց խնդրանքների, պայքարելու տարածաշրջանում օտարերկրյա աջակցություն վայելող ահաբեկչական խմբավորումների դեմ՝ մինչև դրանց ամբողջական վերացումը:

Ղասեմ Սոլեյմանին և իրանամետ շիա աշխարհազորային «Հաշդի Շաաբիի» ղեկավարի օգնական Աբու Մեհդի ալ Մուհենդիսը սպանվել են 2020 թվականի հունվարի 3-ին Բաղդադի օդանավակայանում հրթիռակոծության հետևանքով։ Հրթիռային հարձակումը ավտոշարասյան վրա, որում գտնվել է գեներալը, պատվիրել է ԱՄՆ նախագահ Դոնալդ Թրամփը։ Սոլեյմանին Իրանի քաղաքականության ամենաազդեցիկ դեմքերից էր այնպիսի երկրներում, ինչպիսիք են Աֆղանստանը, Իրաքը, Սիրիան և Լիբիան: