«Թալիբան» շարժման ներկայացուցիչը կոչ է արել պատասխանատվության ենթարկել ԱՄՆ-ին

«Թալիբան» շարժման ներկայացուցիչ Զաբիուլլահ Մուջահիդը կոչ է արել պատասխանատվության ենթարկել ԱՄՆ-ին անցած տարիների իրադարձությունների համար: Այս մասին նա ասել է չինական ԶԼՄ-ներին տված հարցազրույցում` մեկնաբանելով օգոստոսի 29-ին Քաբուլում ԱՄՆ-ի օդային հարձակումը, որի հետևանքով զոհվել էր 10 մարդ, այդ թվում` 7 երեխա:

Մուջահիդի խոսքով` սա միակ նման դեպքը չէ, երբ խաղաղ բնակիչները դառնում են ԱՄՆ-ի գործողությունների զոհը:

«ԱՄՆ-ն արդեն 20 տարի է` խաղաղ բնակիչներին սպանում է Աֆղանստանում»,- ասել է թալիբների ներկայացուցիչը՝ Վաշինգտոնի գործողությունները որակելով որպես մարդու իրավունքների խախտում:

Մուջահիդը նշել է, որ նման իրադարձությունները հանգեցնում են հումանիտար աղետի:

«Միացյալ Նահանգները պետք է պատասխանատվության ենթարկվի անցյալի իրադարձությունների համար: Սպանությունն ու ճնշումը փոխհատուցելու համար նրանք պետք է սկսեն համագործակցել աֆղան ժողովրդի հետ»,- ասել է նա: