Կադիրովը վերջնագիր է ներկայացրել Էրդողանին` սպառնալով հայելային գործողությամբ

Չեչնիայի ղեկավար Ռամզան Կադիրովը Թուրքիայի նախագահ Ռեջեփ Թայիփ Էրդողանին կոչ է արել կա՛մ կառուցել թափանցիկ հարաբերություններ Ռուսաստանի հետ, կա՛մ ընդունել, որ «ահաբեկիչների է ապաստանել»։ Այս մասին Չեչնիայի ղեկավարը գրել է Telegram-ի իր ալիքում։

Նրա խոսքով՝ Ռուսաստանի Դաշնությունում հանցագործություն կատարած «ավազակներն ու սրիկաները» ապաստան են գտնում Թուրքիայում, և այնտեղ հավաքներ ու միջոցառումներ կազմակերպվում, որպեսզի այգիները վերանվանեն ահաբեկիչների անուններով։

Այսպես է Կադրովն արձագանքել Թուրքիայում չեչեն անջատողական նախագահ Ջոհար Դուդաեւի անվան զբոսայգու բացմանը դեկտեմբերի 10-ին Թուրքիայի Քոջաելի նահանգի Քյորֆեզ փոքրիկ քաղաքում։

Դուդաևը չեչեն անջատողականների առաջնորդն էր, հանդես էր գալիս Չեչնիայի՝ Ռուսաստանից անջատման օգտին։ Հենց նա է ղեկավարել դաշնային ուժերի դեմ ռազմական գործողությունները, որոնք սկսվել են 1994 թվականի դեկտեմբերին։

Կադիրովի կարծիքով՝ ահաբեկիչներն այնքան հանգիստ են իրենց զգում Թուրքիայում, որ «ցինիկ, արհամարհական և սադրիչ հակառուսական ելույթներում չեն խորշում անպաշտպան կանանց նկատմամբ գռեհկությունից»։

Մի քանի տարի առաջ Կադիրովը Էրդողանին խնդրել էր Թուրքիային՝ արտահանձնել Չեչնիայում գործողություն իրականացրած ահաբեկիչներին։