Լոնդոնի «ույղուրական դատարանը» Չինաստանի իշխանություններին մեղավոր է ճանաչել ույղուր-թյուրքերի ցեղասպանության մեջ

Մեծ Բրիտանիայի մայրաքաղաք Լոնդոնում ստեղծված «Ույղուրական դատարանը», որն  ուսումնասիրում է Չինաստանի արևելքում չինական իշխանությունների կողմից իրականացվող քաղաքականությունն ընդդեմ ույղուրների, Չինաստանի իշխանություններին մեղավոր է ճանաչել ույղուր-թյուրքերի և այլ ազգային փոքրամասնությունների ցեղասպանության մեջ։ Դատավճիռը հրապարակվել է հինգշաբթի՝ դեկտեմբերի 9-ին՝ Ցեղասպանության կանխարգելման միջազգային օրը։

Դատարանը որոշել է, որ Չինաստանի Կոմունիստական կուսակցությունը միտումնավոր ձգտում է մասամբ ոչնչացնել ույղուր թուրքերին և նրանց կենսակերպը։

Դատական կոլեգիայի նախագահ Ջեֆրի Նիսն ասել է, որ կառավարությունը իրականացրել է զանգվածային կալանքի, ընտանիքների բաժանման, ստերիլիզացման, սեռական բռնության, հարկադիր աշխատանքի և մշակութային ժառանգության օբյեկտների ոչնչացման քաղաքականություն:

Նրա խոսքով՝ դատարանը որոշել է, որ Չինաստանի Կոմունիստական կուսակցությունը նպատակաուղղված ու համակարգված քաղաքականություն է վարել՝ նվազեցնելու համար ծնելիությունը ույղուր թուրքերի շրջանում։ Բացի ցեղասպանությունից, Չինաստանը մեղավոր է ճանաչվել մարդկության դեմ հանցագործությունների, այդ թվում՝ բռնության, խոշտանգումների և բռնի ստերիլիզացման համար։

Դատարանի վճիռն իրավաբանորեն պարտավորեցնող չէ և ստեղծվել է միջազգային դատարանների միջոցով Չինաստանին արդարադատության ենթարկելու նպատակով։

Հունիսին և սեպտեմբերին տեղի ունեցած հանդիպումներում լսվել են վկաների ու փորձագետների ցուցմունքները, հավաքվել են հարյուրավոր էջեր ապացույցներ: Չինաստանը հրաժարվել է ներկայացուցչին ուղարկել դատական նիստին։

ԱՄՆ պետդեպարտամենտը, Մեծ Բրիտանիայի, Բելգիայի, Կանադայի և Նիդերլանդների խորհրդարանները ույղուր-թյուրքերի դեմ Չինաստանի գործողությունները ճանաչել են որպես ցեղասպանություն։