Եվրոպական դատարանը մեղավոր է ճանաչել Ադրբեջանի իշխանություններին բլոգեր Լապշինի սպանության փորձի մեջ

Մարդու իրավունքների եվրոպական դատարանը Ադրբեջանի իշխանություններին մեղավոր է ճանաչել ռուս-իսրայելցի հայտնի բլոգեր Ալեքսանդր Լապշինի սպանության փորձի մեջ: Այս մասին ինքը՝ Լապշինը, հայտնել է իր ֆեյսբուքյան էջում։

«Հաղթանակ! Մարդու իրավունքների եվրոպական դատարանը Ադրբեջանի իշխանություններին մեղավոր է ճանաչել Բաքվի բանտում իմ դեմ սպանության փորձ կատարելու և դաժան խոշտանգումներ կիրառելու մեջ»,- գրել է նա:

Ըստ բլոգերի՝ Ադրբեջանին պարտավորեցրել են իրեն վճարել  30.000 եվրո փոխհատուցում: Լապշինը շնորհակալություն է հայտնել իր պաշտպանների թիմին աշխատանքի համար:

2016-ի վերջին Լապշինը Մինսկում ձերբակալվեց Ադրբեջանի պահանջով, որը նրան ընդգրկել էր «սև ցուցակում»՝ առանց Ադրբեջանի իշխանությունների համաձայնության Արցախ այցելելու համար: Նա յոթ ամիս անցկացրել էր ադրբեջանական բանտում:

Բլոգերը, դատարանում ելույթ ունենալով, հայտնել է, որ ինքը Ղարաբաղում է եղել որպես զբոսաշրջիկ և ղեկավարությունից ոչ մեկի հետ չի հանդիպել:

Ադրբեջանի նախագահ Իլհամ Ալիևը սեպտեմբերի 11-ին հրաման է ստորագրել նրա ներման մասին, որից հետո նրան տեղափոխել են Իսրայել: Իսրայել հասնելուն պես Լապշինը հայտարարել է, որ Բաքվի բանտում իրեն ֆիզիկական և հոգեբանական խոշտանգումների են ենթարկել, նա նաև խոսել է խեղդամահությամբ սպանության փորձի մասին: