Դատարանը մեղավոր է ճանաչել Wikileaks-ի հետ համագործակցող բանկիրին

Շվեյցարիայի ոստիկանությունը ձերբակալել է բանկիր Ռուդոլֆ Էլմերին` աշխարհի հարուստ հաճախորդների բանկային հաշվիների մասին գաղտնի ինֆորմացիան Wikileaks-ին տրամադրելու համար:

Էլմերը ձերբակալվել է դատարանի վճռի հրապարակումից մի քանի ժամ անց: Նրան մեղավոր են ճանաչել բանկի տվյալների բազայից ինֆորմացիա գողանալու, շանտաժ անելու եւ գումար շորթելու համար:

Ինչպես նախկինում հաղորդվել էր, Ռուդոլֆ Էլմերը, ով գլխավորել է Julius Baer բանկի Կարիբյան ծովում գտնվող Կայմանյան կղզիներում գործող մասնաճյուղը, հունվարի 19-ին դատարան էր կանչվել` բանկային գաղտնիքը բացահայտելու գործի վերաբերյալ հարցաքննության:

Ինչպես նշված է տվյալ քրեական գործի նյութերում, Էլմերը սպառնացել է բանկի աշխատակազմին եւ գումար է պահանջել` այդ ինֆորմացիան չհրապարակելու դիմաց:

Հիշեցնենք, որ Էլմերը Wikileaks-ին փոխանցել է իր գլխավորած բանկային մասնաճյուղի «հարուստ եւ հայտնի հաճախորդների բանկային գաղտնիքները»: Այդ փաստաթղթերը կարող են բացահայտել այնպիսի կեղծիքներ, որոնք թույլ են տվել տվյալ հարուստ ու հայտնիներին հարկեր վճարելուց խուսափել:

Այս մասին գրում է Associated Press-ը: