Մոսկվայի դատարանը Հրաչյա Հարությունյանին մեղավոր է ճանաչել

Մոսկվայի Տրոիցկի դատարանը ՀՀ քաղաքացի Հրաչյա Հարությունյանին մեղավոր է ճանաչել Պոդոլսկի մոտ ուղևորատար ավտոբուսի և «ԿԱմԱԶ» մակնիշի բեռնատարի բախման գործով. հայտնում է ИТАР-ТАСС-ը:

 Հարությունյանի մեղքն ամբողջությամբ ապացուցվել է. նա մեղադրվում է ճանապարհային երթևեկության և տրանսպորտային միջոցների շահագործման կանոնների խախտման մեջ:

Դատավճռում նշվում է,  որ Հարությունյանը տեղյակ է եղել «ԿԱմԱԶ»-ի արգելակման համակարգի անսարքության մասին: Հարությունյանը չի կարողացել վերահսկել մեքենան և ստեղծել է վթարային իրավիճակ, ինչը հանգեցրել է ավտովթարի և զոհերի:

Այժմ դատարանը շարունակում է դատավճռի հրապարակումը, որը կտևի մոտ 6 ժամ:

Երկուշաբթի օրը դատարանը լսել է Հարությունյանի վերջին խոսքը, որում նա ևս մեկ անգամ ներողություն է խնդրել զոհվածների հարազատներից ու տուժածներից:  

Հիշեցնենք, որ անցյալ տարվա հուլիսի 13-ին Մերձմոսկվայում Հրաչյա Հարությունյանի վարած բեռնատարը բախվել էր ուղեւորատար ավտոբուսին, ինչի հետեւանքով զոհվել էր 18 մարդ: Հարությունյանը հրաշքով էր փրկվել: