Թուրքիայի խորհրդարանը երկարաձգել է Ադրբեջանում և Արցախում թուրք զինվորականների ներկայության ժամկետը

Թուրքիայի Ազգային մեծ ժողովը հավանություն է տվել Ադրբեջանում և թշնամուն հանձնված Ակնայում թուրք զինվորականների գտնվելու մանդատի երկարաձգմանը։

Թուրքիայի նախագահ Ռեջեփ Թայիփ Էրդողանի ստորագրած օրինագծի համաձայն՝ 2021 թվականի նոյեմբերի 17-ից Ադրբեջանում թուրք զինվորականների առաքելության ժամկետը կերկարաձգվի ևս մեկ տարով։

2020 թվականի նոյեմբերի 17-ին Թուրքիայի խորհրդարանի լիագումար նիստում հավանության է արժանացել երկրի նախագահ Ռեջեփ Թայիփ Էրդողանի առաջարկը՝ թուրք զինվորականներին Ադրբեջան ուղարկելու վերաբերյալ։

Խորհրդարանը թույլ է տվել մեկ տարի ժամկետով ռազմական անձնակազմ ուղարկել Ադրբեջան՝ Թուրքիայի և Ադրբեջանի միջև ռազմավարական գործընկերության և փոխօգնության մասին համաձայնագրի դրույթներից բխող պարտավորությունները կատարելու համար՝ Արցախի Ակնա շրջանում ստեղծված ռուս-թուրք-ադրբեջանական մոնիթորինգի կենտրոնում հրադադար հաստատելու, խախտումները կանխելու, խաղաղություն ապահովելու նպատակով։