Թուրքիան նշել է Ադրբեջանում իր զինվորականների գտնվելու ժամկետը

Թուրք զինվորականները Լեռնային Ղարաբաղում Ռուսաստանի Դաշնության հետ համատեղ մեկ տարի կգործեն մոնիթորինգային կենտրոնում՝ հրադադարի ռեժիմը վերահսկելու համար:

Թուրքիայի պաշտպանության նախարար Հուլուսի Աքարը շաբաթ օրը հայտարարել էր, որ թուրք զինվորականները շուտով կմեկնեն Ադրբեջան, ցամաքային զորքերն ավարտել են իրենց պատրաստությունները։

Թուրքիայի նախագահ Էրդողանը նոյեմբերի 11-ին հայտարարել էր, որ Անկարան և Մոսկվան հուշագիր են ստորագրել Արցախում հրադադարի ռեժիմը վերահսկելու կենտրոնի վերաբերյալ, իրենք կմասնակցեն «համատեղ խաղաղապահ առաքելությանը»: Դրանից առաջ ՌԴ նախագահի մամուլի քարտուղար Դմիտրի Պեսկովը հայտարարել էր, որ Մոսկվան և Անկարան կաշխատեն Ղարաբաղի հարցով Ադրբեջանի տարածքում դիտորդական կենտրոնի միջոցով, բայց «համատեղ խաղաղապահ ուժերի մասին խոսք չկա»:

Նշենք, որ 1 տարի ժամկետը պայմանական է, քանզի Թուրքիան արդեն ունի պրակտիկա՝ (Սիրիայում և Լիբիայում) իր զորքերի ներկայությունն այլ երկրում երկարաձգելու առումով։