Թուրքիայի խորհրդարանը հնարավոր է քննարկի Ղարաբաղ զինվորականների գործուղելու հարցը

Թուրքիայի խորհրդարանի խոսնակ Մուստաֆա Շենթոփը ՌԻԱ «Նովոստի»-ին ասել է, որ երկրի բարձրագույն օրենսդիր մարմինը հնարավոր է քննարկի Լեռնային Ղարաբաղի հակամարտության ֆոնին թուրքական զորքեր Ադրբեջան ուղարկելու հարցը, բայց դրա անհրաժեշտությունը դեռ չկա:

«Վերջին մի քանի օրվա ընթացքում Ադրբեջանի զինված ուժերը ցույց տվեցին ամբողջ աշխարհին, որ իրենք ի վիճակի են ինքնուրույն հաղթանակի հասնել, վճռականություն և համառություն ցուցաբերել գրավյալ տարածքների ազատագրման հարցում: Հետևաբար, չեմ կարծում, որ այդպիսի առաջարկ անհրաժեշտ կլինի` մինչև այնքան ժամանակ, քանի դեռ երրորդ կողմերը չեն ներգրավվել այս հակամարտության մեջ՝ անտեսելով ՄԱԿ-ի բանաձևերը»,- ասել է Շենթոփը՝ մոռանալով սեփական երկրի՝ այս հակամարտության մեջ որպես երրորդ կողմ ներքաշված լինելն ու ադրբեջանական բանակի անհաջողությունները առաջնագծում:

Նա հավելել է, որ «ցանկացած պարագայում Թուրքիայի աջակցությունն Ադրբեջանին անփոխարինելի է ցանկացած պարագայում, ինչպես նա (Ադրբեջանը) կցանկանա»: