Թուրքիայի իշխանությունները ձերբակալել են «Մոսադ»-ի 15 ենթադրյալ գործակալների

Այս ամսվա սկզբին թուրքական ոստիկանությունը ձերբակալել է 15 մարդու, որոնք իբր լրտեսել են Իսրայելի «Մոսադ» հետախուզական գործակալության օգտին. հաղորդում է թուրքական NTV-ն։

Հոկտեմբերի 7-ին անվտանգության ծառայության աշխատակիցները ռեյդ են անցկացրել հանրապետության չորս նահանգներում՝ ձերբակալելով ազգությամբ արաբ ենթադրյալ լրտեսների՝  հինգ բջիջներից:

Զեկույցում նշվում է, որ մոտ 200 հետախույզ է ներգրավված եղել ենթադրյալ լրտեսների բացահայտմանն ուղղված և մեկ տարի տևած գործողության մեջ:

Հեռուստաալիքի տվյալներով՝ կասկածյալները տեղեկություններ են հայթայթել թուրքական կառավարության և քաղաքապետարանների կողմից պաղեստինցիներին ցուցաբերվող օգնության, ինչպես նաև այն մասին, թե ինչպես են պաղեստինցիները ընդունվում թուրքական բուհեր։ Խումբը նաև տեղեկություններ է հավաքել երկրում օտարերկրյա ուսանողների մասին, որոնք հետագայում հնարավոր է աշխատեին Թուրքիայի պաշտպանական արդյունաբերության մեջ, ինչպես նաև տեղեկություններ երկրում գործող տարբեր կազմակերպությունների ու ասոցիացիաների մասին:

Ենթադրյալ լրտեսական ցանցի հետաքննությունը կշարունակվի. հաղորդում է NTV-ն։