Բայդենը չի վստահում գաղտնի ծառայության որոշ գործակալների

Նախագահ Ջո Բայդենը չի վստահում գաղտնի ծառայության որոշ գործակալների եւ չի հավատում իր շան՝ Մայորի կծելու հետ կապված միջադեպի որոշ մանրամասներին։

Քրիս Ուիփլի «Նրա ողջ կյանքի պայքարը: Ջո Բայդենի Սպիտակ տան ներսում» գրքում ասվում է, որ Բայդենը վստահության խնդիրներ ունի որոշ գործակալների հետ, մասամբ այն պատճառով, որ նրանք նախկին նախագահ Թրամփի վճռական կողմնակիցներն են:

«Մեծ խնդիրը Բայդենի անհանգստությունն է՝ իր գաղտնի ծառայության պատճառով․ նրանցից ոմանք MAGA-ի («Ամերիկան կրկին դարձրեք հզոր» շարժման) կողմնակիցներն են եղել: Նա նրանց չէր վստահում»,- նշել է Ուիփլը, գրում է The Hill-ը։

Շատ գործակալներ «կարեկցում են MAGA-ին», իսկ «Գաղտնի ծառայությունը լի է հարավից սպիտակ նախկին ոստիկաններով, որոնք հակված են խորապես պահպանողական լինել»,- գրել է Ուիփլը:

«Շրջապատված անծանոթների նոր ֆալանգով՝ Բայդենը չէր կարող չմտածել՝ արդյո՞ք այս մարդիկ իսկապես ուզում են, որ ես այստեղ լինեմ»,- նշել է նա։

Կան նաեւ խնդիրներ 2021 թվականի մարտի միջադեպի հետ կապված, երբ Մայորը՝ նախագահի գերմանական հովվաշունը, կծել էր գաղտնի ծառայության գործակալին: Հաղորդվում է, որ նախագահը թերահավատորեն է վերաբերվել իրավիճակի վերաբերյալ գաղտնի ծառայության զեկույցին: Չնայած նա չի վիճարկել կծելու փաստը, Բայդենն ընկերոջն ասել է, որ գաղտնի ծառայության գործակալները երբեք չեն լինում Սպիտակ տան երկրորդ հարկում, որտեղ տեղի է ունեցել դեպքը։