Մոսկվան իր դիրքորոշումը հասցրել է Բաքվին` կապված Լաչինում ադրբեջանա-թուրքական զորավարժությունների հետ. Զախարովա

Ռուսաստանը Բաքվին հասցրել է իր դիրքորոշումը՝ կապված Լաչինում ադրբեջանա-թուրքական զորավարժությունների հետ: Այս մասին հերթական ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով Հայաստանի Հանրային հեռուստաընկերության թղթակցի հարցին Արցախի Լաչինի շրջանում Ադրբեջանի և Թուրքիայի համատեղ զորավարժությունների մասին, որոնք սկսվել են սեպտեմբերի 6-ին և իրականացվում են մարտական կրակով:

 «Այս հարցում ռուսական դիրքորոշումը ներկայացվել է պաշտոնական Բաքվի ուշադրությանը: Հաշվի առնելով այն փաստը, որ այն ըմբռնումով է ընկալվել ադրբեջանցի գործընկերների կողմից, ես, անկեղծ ասած, հնարավոր եմ համարում զերծ մնալ հրապարակային մեկնաբանություններից: Մենք կապի մեջ ենք մեր ադրբեջանցի գործընկերների հետ», - ասել է Զախարովան: