Բաքվում նշել են քաղաքի «ազատագրման» 103-ամյակը, Թուրքիան շնորհավորել է՝ կապելով Արցախի օկուպացիայի հետ

Ադրբեջանը շարունակում է իր կարճ գոյության պատմությունից «տոներ» ստեղծել  և մեծ շուքով նշել եղբայրական Թուրքիայի հետ։

Երեկ՝ սեպտեմբերի 15-ին, Բաքվում զինորական երթ է անցկացվել՝ կապված Օսմանյան կայսրության կովկասյան իսլամական բանակի՝ Բաքու ներխուժման 103-րդ տարեդարձի հետ: Երթը ուղեկցվել է զինվորական նվագախմբով: Ադրբեջանում այս օրը համարվում է «քաղաքի՝ օկուպացիայից ազատագրման» օր «բոլշևիկ-դաշնակցական» ուժերից:

«Հատկանշական է, որ Բաքվի ազատագրման 103-րդ տարեդարձին Ղարաբաղը նույնպես ազատվեց օկուպացիայից: Ես հարգում եմ մեր սիրելի նահատակների հիշատակը, թող նրանց հոգիները հանգստանան»,- Twitter-ում գրել է Թուրքիայի արտգործնախարար Մևլութ Չավուշօղլուն:

«Ես անկեղծորեն շնորհավորում եմ ձեզ բարեկամ և եղբայրական Ադրբեջանի մայրաքաղաք Բաքու քաղաքի՝ օկուպացիայից ազատագրման տարեդարձի կապակցությամբ, թող Ալլահը հանգստություն տա Կովկասյան իսլամական բանակի հրամանատար Նուրի փաշայի և նրա հերոս զինվորների հոգիներին»,- Twitter-ում գրել է Թուրքիայի նախագահ Ռեջեփ Թայիփ Էրդողանը:

«Իմ ողջույններն ու սերն եմ փոխանցում ադրբեջանական ժողովրդին»,- հավելել է Թուրքիայի նախագահը:

Հիշեցնենք, որ 1918 թվականի սեպտեմբերի 15-ին Օսմանյան պետության կովկասյան իսլամական բանակը, Նուրի փաշայի գլխավորությամբ, ներխուժել է Բաքու՝ գրավելով քաղաքը: Քաղաքի գրավումից հետո այստեղ շարունակվել է հայ բնակչության կոտորածը։