ԱՄՆ-ը սպառնացել է թալիբներին ավիահարվածներով, եթե նրանք շարունակեն հարձակումը

ԱՄՆ ռազմաօդային ուժերը պատրաստ են առաջիկա օրերին շարունակել ինտենսիվ օդային աջակցություն տրամադրել աֆղանական ուժերին, քանի դեռ «Թալիբան»-ը չի դադարեցրել իր առաջխաղացումը: Այս մասին հայտարարել է ԱՄՆ Կենտրոնական հրամանատարության ղեկավար Քենեթ Մաքքենզին:

«ԱՄՆ-ը վերջին օրերին ուժեղացրել է ավիահարվածները՝ աֆղանական ուժերին աջակցելու համար: Եվ մենք պատրաստ ենք առաջիկա օրերին շարունակել տրամադրել օդային աջակցություն այսպիսի ինտենսիվ մակարդակով, եթե «Թալիբան»-ը շարունակի գրոհել»,- ասել է Մաքքենզին:

«Ես կցանկանայի հստակ նախազգուշացնել, որ առաջիկա օրերին Աֆղանստանի իշխանություններին բարդ փորձություններ են սպասվում: Թալիբները փորձում են տպավորություն ստեղծել, թե իրենց հաղթանակն անխուսափելի է: Այնուամենայնիվ, նրանք սխալվում են. «Թալիբանի» հաղթանակն անխուսափելի չէ»,- ավելացրել է Մաքքենզին: