Միացյալ Նահանգները դուրս է բերել իր զորքն Աֆղանստանի Բագրամ ավիաբազայից

Միացյալ Նահանգները դուրս է բերել իր զորքն Աֆղանստանի Բագրամ ավիաբազայից: Մայրաքաղաք Քաբուլին մոտ գտնվող այս ավիաբազան ամերիկյան ուժերի տեղակայման հիմնական վայրն էր՝ Աֆղանստանում Նահանգների ռազմական գործողությունների մեկնարկից ի վեր, վերջին 20 տարիների ընթացքում:

Ավելի վաղ ԱՄՆ-ի նախագահ Ջո Բայդենը հայտարարել էր, որ ամերիկյան զորքն ամբողջովին դուրս կբերվի Աֆղանստանից մինչեւ սեպտեմբերի 11-ը՝ Նահանգներում 2001 թվականին տեղի ունեցած ահաբեկչական հարձակումների տարելիցի օրը:

Վաշինգտոնն Աֆղանստանում կթողնի 650 զինծառայող՝ դիվանագետների անվտանգությունն ապահովելու համար: Բագրամից ամերիկյան ստորաբաժանումների դուրսբերումը դրական քայլ է որակել «Թալիբան» շարժումը՝ նշելով, որ Աֆղանստանն ավելի կմոտենա կայունությանն ու խաղաղությանը, երբ օտարերկրյա բոլոր ուժերը դուրս բերվեն երկրի տարածքից: