Պուտինը նշել է, որ ԱՄՆ-ը զինված հեղաշրջում է իրականացրել Ուկրաինայում 2014 թ․

2014-ին Ուկրաինայում տեղի ունեցած պետական հեղաշրջումը, որը հանգեցրել է երկրի պառակտմանը և Ղրիմի անջատմանը, կազմակերպվել էր ԱՄՆ-ի կողմից և վայելում էր Եվրոպայի պետությունների աջակցությունը: Այս մասին ասել է ՌԴ նախագահ Վլադիմիր Պուտինը Հայրենական մեծ պատերազմի մեկնարկի 80-ամյակի կապակցությամբ երեքշաբթի լույս տեսած իր «Բաց լինել՝ չնայած անցյալին» հոդվածում:

«Ինչո՞ւ ԱՄՆ-ը հեղաշրջում կազմակերպեց, իսկ եվրոպական երկրները աջակցում էին դրան՝ հրահրելով բուն Ուկրաինայի պառակտումը և Ղրիմի դուրս գալը նրա կազմից»,- ասվում է Ռուսաստանի առաջնորդի հոդվածում:

Ընդհանուր առմամբ, անդրադառնալով սառը պատերազմի ավարտից և ՆԱՏՕ-ի ընդլայնումից հետո եվրոպական մայրցամաքում տիրող իրավիճակին, Պուտինը նշում է, որ «շատ երկրներ կանգնած էին արհեստական ընտրության առջև՝ լինել կա՛մ կոլեկտիվ Արևմուտքի, կա՛մ Ռուսաստանի հետ»: 

«Իրականում դա ուլտիմատում էր»,- շեշտել է նա:

Ռուսաստանի նախագահը նշել է, որ «2014-ի ուկրաինական ողբերգության օրինակով» պարզ է դառնում, թե «ինչ հետևանքների է հանգեցրել նման ագրեսիվ քաղաքականությունը»: «Եվրոպան ակտիվորեն աջակցում էր Ուկրաինայում հակասահմանադրական զինված հեղաշրջմանը: Այդպես էլ սկսվեց ամեն ինչ: Ինչո՞ւ էր դա պետք անել: Այդ ժամանակվա  նախագահ Յանուկովիչը արդեն համաձայնել էր ընդդիմության բոլոր պահանջներին»,- ասել է Պուտինը: