Քաղաքացու օրը կոչված է նշել զուտ իշխանափոխությունը, մինչդեռ 1945-ի հաղթանակից 20 տարի հետո են միայն նշել հաղթանակը. Ալավերդյան

«Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանն այդքան էլ լուրջ չի համարում Քաղաքացու օրը` հասարակության պառակտման տեսանկյունից, համենայն դեպս, իր դեպքում այն չի պառակտում, որովհետև, ըստ նրա, Քաղաքացու օրը կոչված է նշել զուտ իշխանափոխությունը: 

«1945-ի հաղթանակից 20 տարի հետո են նշել այդ օրը և ոչ աշխատանքային դարձրել: Իսկ մեր այդ շտապողականությունը գալիս է միայն հաստատելու նոր եկած ուժի հաղթանակը նշելու ցանկությունը: Դեռ Խորենացին է ասել՝ ամենափոքր թերությունն իշխանության մեջ հազարապատիկ արտահայտվում է ժողովրդի մեջ: Եվ մեր անհանգստությունը գալիս է ոչ թե նրանից, որ Զարթոնքում մեկին հանել են, հիմա էլ ուզում են աղջկան հանել, այլ այն բանից, որ այդ մեթոդը խրախուսվում է: Եվ այստեղ շատ կարևոր է բառապաշարը, որն օգտագործվում է առաջին էշելոնի բոլոր մարդկանց կողմից: Եթե մենք սրան նշանակություն չտանք, եթե ինչպես «Իմ քայլից» շատ պատգամավորներ, արժանապատվությունը նսեմացնող ձևով արդարացնենք այդպիսի բառապաշարը, մենք ունենալու ենք ավելի մեծ խնդիր»,- լրագրողների հետ հանդիպման ժամանակ, ի պատասխան  yerkir.am -ի հարցին, նշեց Ալավերդյանը: 

Նա անդրադարձավ նաև օրենքի առջև բոլորի հավասար լինելու անհրաժեշտությանը: «Ես այդտեղ խնդիրներ եմ տեսնում.  մենք ամեն օր հանդիպում ենք ընտրովի մոտեցումների, որն ինձ համար խնդիր է: Կրկնում եմ՝ մոտեցումները լինում են տարբերակված, և դա շատ պարզ է երևում»,- ընդգծեց Ալավերդյանը:

Հանդիպմանը ներկա` «Մարդկային զարգացման միջազգային կենտրոն» հասարակական կազմակերպության նախագահ Թեւան Պողոսյանն էլ հավելեց. «Եթե Քաղաքացու օրը սիրո և միասնության քարոզի հիմքի մեջ լինի, ոչ մեկի չի պառակտի: Ես կարծում եմ, որ դրա պակասությունը կա, որ մեր միասնականության վրա պետք է աշխատենք, բարություն, սեր և  հանդուրժողականություն պիտի լինի, որովհետև  ուժեղ մարտահրավերներին դիմակայելու մեր ռեալ ռեսուրսը սա է: Եթե մենք այս սիրով վերաբերվեինք, ապա ի սկզբանե կձևավորեինք քաղաքական համերաշխության բանակցային  սեղան»: