Սուդանը ցանկանում է վերանայել բանակցությունները ռուսական բազայի վերաբերյալ

Սուդանը ցանկանում է կրկին բանակցություններ վարել Կարմիր ծովում ռուսական ռազմակայան հիմնելու մասին համաձայնագրի շուրջ: Այս մասին Blue Nile TV  հեռուստաընկերությանը տված հարցազրույցում ասել է Սուդանի զինված ուժերի շտաբի պետ Մուհամեդ Ուսման ալ Հուսեյնը:

Ուսման ալ Հուսեյնը հիշեցրել է, որ համաձայնագիրը ստորագրվել է Սուդանի նախկին կառավարության և Ռուսաստանի միջև: Նրա խոսքով՝ սուդանական կողմը կարող է փոփոխություններ կատարել փաստաթղթում՝ կապված Կարմիր ծովում Ռուսաստանի հետ ռազմական համագործակցության վերաբերյալ: «Համաձայնագիրը կարող է շարունակվել, եթե մենք օգուտներ և շահեր գտնենք մեր երկրի համար»,- բացատրել է նա:

Մոսկվան և Խարտումը Կարմիր ծովի ռազմածովային բազայի մասին համաձայնագիր ստորագրեցին 2020 թվականին: Ըստ դրա՝ աֆրիկյան հանրապետությունը հող կտրամադրի Ռուսաստանի ռազմածովային կայանի համար, որը կարող է տեղավորել ոչ ավելի, քան չորս նավ, ներառյալ՝ միջուկային էներգետիկա ունեցողները: