Սուդանը համաձայնել է Թուրքիայի միջնորդությանը Եթովպիայի հետ սահմանային վեճերում

Սուդանը ընդունել է Եթովպիայի հետ սահմանային վեճերը միջնորդելու՝ Թուրքիայի առաջարկը. սեպտեմբերի 18-ին հայտնել է Սուդանի արտգործնախարար Մարյամ ալ Սադըք ալ Մահդին:

«Անցյալ ամիս Սուդանի ինքնիշխան խորհրդի ղեկավար Աբդել Ֆաթահ ալ Բուրհանի՝ Թուրքիա կատարած այցի ժամանակ նա ընդունել է Թուրքիայի ղեկավարության նախաձեռնությունը՝ Եթովպիայի հետ սահմանային վեճերը լուծելու համար»,- ասել է Սուդանի արտգործնախարարը Խարտումում կայացած համաժողովի ժամանակ:

Hurriyet-ը հայտնում է, որ նա նաև ընդգծել է, որ հյուսիսկաֆրիկյան երկիրը ձգտում է բարելավել Թուրքիայի հետ կապերը տարբեր ոլորտներում, ներառյալ՝ քաղաքական և տնտեսական:

Պարբերականը նշում է, որ ալ Բուրհանն օգոստոսին այցելել էր Թուրքիա և մի շարք տնտեսական պայմանագրեր ստորագրել Թուրքիայի նախագահ Ռեջեփ Թայիփ Էրդողանի հետ:

Նախարարը միաժամանակ ասել է, որ Սուդանը դիմել է ՄԱԿ-ի Անվտանգության խորհրդին՝ Արևմտյան Դարֆուրի տարածաշրջանում իրավիճակով պայմանավորված միջազգային պատժամիջոցները հանելու խնդրանքով:

Հոդվածում ասվում է, որ անցյալ ամիս Էրդողանն աջակցել է Եթովպիայում Տիգրայի հակամարտության խաղաղ կարգավորմանը, որի հետևանքով տասնյակ հազարավոր մարդիկ փախուստի էին դիմել և միլիոնավորները՝ սովի մատնվել: Նա նաև ասել է, որ Թուրքիան պատրաստ է միջնորդ լինել Եթովպիայի և Սուդանի միջև՝ սահմանային առանձին վեճը լուծելու համար: Էրդողանի խոսքերը հնչել են Եթովպիայի վարչապետ Աբի Ահմեդի հետ համատեղ մամուլի ասուլիսի ժամանակ:

Հրապարակման մեջ նշվում է, որ Սուդանի և Եթովպիայի հարաբերություններում լարվածությունն աճում է Եթովպիայի հյուսիսում գտնվող Տիգրայ շրջանի հակամարտության և Կապույտ Նեղոսի վրա հսկա հիդրոէլեկտրակայանի կառուցման պատճառով: Տիգրայի հակամարտությունը տասնյակ հազարավոր փախստականների պատճառ է դարձել և ռազմական բախումներ առաջացրել երկու երկրների սահմանի երկայնքով՝ վիճելի գյուղատնտեսական հողերի տարածքում: