Դոնբասում թուրքական ԱԹՍ-ները Ռուսաստանին «քիչ ուրախություն» են պատճառում. ՌԴ ԱԳՆ

Դոնբասում թուրքական անօդաչու թռչող սարքերի հայտնվելը «քիչ ուրախություն» է պատճառում Ռուսաստանում. երեքշաբթի լրագրողներին ասել է ՌԴ փոխարտգործնախարար Սերգեյ Ռյաբկովը:

«Իհարկե, քիչ ուրախություն կա այն փաստի մեջ, որ թուրքական անօդաչու թռչող սարքերը, ինչպես ասում են, հայտնվում են ինչ-որ տեղ Դոնբասում»,- ասել է նա:

Միևնույն ժամանակ, Ռուսաստանի Դաշնության փոխարտգործնախարարը շեշտել է, որ Ռուսաստանը և Թուրքիան ունեն «նորմալ և բազմաբնույթ» հարաբերություններ, երկրների միջև բոլոր հարցերի քննարկումը «ընթանում է աշխատանքային եղանակով»:

Շաբաթ օրը Ուկրաինայի Գերագույն ռադայի ազգային անվտանգության, պաշտպանության և հետախուզության կոմիտեի ղեկավարի տեղակալ Յուրի Միսյագինն ասել էր, որ ուկրաինական բանակի սպառազինությունում առկա՝ թուրքական արտադրության Bayraktar անօդաչու սարքն առաջին անգամ թռչել է Դոնբասում տեղի ունեցող գործողությունների վայրում: