Էրդողանը նշել է Կիպրոսի խնդրի կարգավորման հիմքը

Կիպրոս կղզում երկու փաստացի պետությունների ինքնիշխան հավասարությունը պետք է հիմք հանդիսանա Կիպրոսի խնդրի կարգավորման համար: Այս մասին նոյեմբերի 15-ին Նիկոսիայի հյուսիսային մասում կայացած արարողության ժամանակ ասել է Թուրքիայի նախագահ Ռեջեփ Թայիփ Էրդողանը:

«Կիպրոսն ունի երկու տարբեր ժողովուրդներ և երկու առանձին պետություններ: Երկու պետությունների վերաբերյալ որոշումը պետք է քննարկվի ինքնիշխան հավասարության հիման վրա»,– Էրդողանի խոսքերն է մեջբերում Bayrak հեռուստատեսությունը։

Թուրքիայի ղեկավարը Կիպրոսի թուրքերին անվանել է Կիպրոսի հարցում միակ տուժած կողմը:

«Երկար տարիներ նրանց շահերն անտեսվել են, իսկ իրավունքները՝ ուզուրպացվել։ Կիպրոսի խնդրի կայուն լուծման հասնելը Անկարայի համար առաջնային խնդիր է»,- շեշտել է նա Հյուսիսային Կիպրոսի Թուրքական Հանրապետության (ՀԿԹՀ) հիմնադրման 37-րդ տարեդարձին նվիրված արարողության ժամանակ: