Կիպրոսն արգելափակում է Բելառուսի դեմ պատժամիջոցներ կիրառելու՝ ԵՄ փորձերը

ԵՄ երկրները չեն կարող պատժամիջոցներ կիրառել Բելառուսի դեմ, քանի որ Կիպրոսը դա թույլ չի տալիս` արգելափակելով այդ որոշումը. հայտնում է gazeta.ru-ն՝ Frankfurter Allgemeine թերթին հղումով: Նիկոսիան պահանջում է նույնանման միջոցներ կիրառել նաև Թուրքիայի դեմ՝ Արևելյան Միջերկրականում գազ արդյունահանելու՝ Անկարայի ծրագրերի պատճառով:

ԶԼՄ-ի տեղեկություններով՝ պատժամիջոցների շուրջ համաձայնություն չի հաջողվում ձեռք բերել մինչև ԵՄ արտգործնախարարների հաջորդ հանդիպումը, որը տեղի կունենա սեպտեմբերի 21-ին: Այնուամենայնիվ, օգոստոսի 14-ին Եվրամիության երկրների արտաքին գործերի նախարարները սկզբունքորեն աջակցել էին դրանց կիրառմանը: Այնուհետև դիվանագետներին հաջողվել էր կազմել այն քաղաքացիների ցուցակը, որոնց կարգելվի մուտք գործել ԵՄ, և հաշիվները կսառեցվեն: Հստակեցվում է, որ ցուցակում ներառվել է շուրջ 40 մարդ: