Բաքվի ռեժիմի դեմ պատժամիջոցներ կիրառելու ժամանակն է. Ադրբեջանում ԱՄՆ նախկին դեսպան

Ադրբեջանում ԱՄՆ նախկին դեսպան Ռիչարդ Կոզլարիչը Twitter-ի իր միկրոբլոգում հանդես է եկել ի պաշտպանություն ադրբեջանցի քաղբանտարկյալ Սալեհ Ռուստամովի, որն արդեն 20 օր է՝ բանտում հացադուլ է հայտարարել։

«Բաքվի ռեժիմը խախտում է իր քաղաքացիների իրավունքները և գործում անպատիժ։ Ժամանակն է, որ Միացյալ Նահանգները պատժամիջոցներ սահմանի Ռուստամովի ձերբակալության և կալանավորման մեջ մեղավորների նկատմամբ։ Վաշինգտոնն ունի գործիքներ, նա պետք է կիրառի դրանք»,- ասել է դիվանագետը:

Ադրբեջանական Turan թերթի հաղորդմամբ՝ Ռուստամովի հացադուլի պատճառը անօրինական ձերբակալությունն ու դատապարտումը, համաներումը մերժելը և նրա ընտանիքի ունեցվածքի բռնագրավումն է։

Փաստաբան Բահրուզ Բայրամովը Ռուստամովի վիճակը գնահատել է ծանր։ Չնայած իրավապաշտպանների, քաղաքացիական ակտիվիստների, լրագրողների բազմաթիվ դիմումներին՝ ուղղված իշխանություններին, արձագանք չկա։