Վրաստանում կորոնավիրուսից մահացած քաղաքացին Ջավախքից էր

Վրաստանում  կորոնավիրուսից 15-րդ մահն է արձանագրվել: Մահացած տարեց տղամարդը Ախալքալաքի շրջանի Աբուլ գյուղից էր. այս մասին գրում է nor.ge-ն։

Ախալքալաքի մունիցիպալիտետի  բնակիչ Վ.Բ.-ն կորոնավիրուսի պատճառով առաջացած բարդություններից Ռուսթավիի հիվանդանոցում մահացել է: Տղամարդը 82 տարեկան էր:

Կորոնավիրուսից մահացած տղամարդը 10 օր առաջ որդու հետ Հայաստանից էր եկել և անցնում էր կարանտինյան շրջանը: Կարանտինի ավարտին մնացել էր ընդամենը 4 օր: Սակայն նա հոսպիտալացվել էր արյան բարձր ճնշման և սրտի անբավարարության պատճառով:

«Կարանտինի ընթացքում նրա ճնշումը բարձրացել էր, և նրան տեղափոխել էին հիվանդանոց: Տղամարդը 82 տարեկան էր, նա կարանտինում իր որդու հետ էր, 4 օր էր մնացել կարանտինի ավարտին», – ասաց Ախալքալաքի ՀԱԿ-ի տնօրեն Ավետիք Տոնականյանը:

Սահմանը հատելու և կարանտինի անցնելու պահին նրա վիճակը նորմալ է եղել: Վ.Բ.-ն բուժում էր ստանում Ռուսթավի քաղաքի հիվանդանոցներից մեկում:

Տղամարդուն բերել են գյուղ և հուղարկավորել:

Վրաստանի 82-ամյա քաղաքացի Վ.Բ.-ն դարձավ երկրում կորոնավիրուսից մահացած 15-րդ հիվանդը: