Կարանտինից հետո Ադրբեջանում մարդու իրավունքների վերաբերյալ զեկույցները կրիտիկական կլինեն. ԵԽԽՎ զեկուցող

Կարանտինից հետո միջազգային կազմակերպությունների զեկույցները Ադրբեջանում մարդու իրավունքների իրավիճակի վերաբերյալ կրիտիկական կլինեն: Այս մասին հայտարարել է Ադրբեջանում քաղբանտարկյալների հարցով Եվրոպայի խորհրդի խորհրդարանական վեհաժողովի (ԵԽԽՎ) զեկուցող Սուննա Էվարսդոտիրը ՝ «Ազատություն ռադիոկայանի» ադրբեջանական ծառայությանը տված հարցազրույցում:

«Ադրբեջանը, ինչպես և մյուս երկրները, այժմ կարանտինային իրավիճակում է, և դժվար է տեղեկություններ ստանալ այնտեղ տեղի ունեցող իրադարձությունների վերաբերյալ: Այնուամենայնիվ դա միշտ չի շարունակվի», - նշել է նա:

Համաճարակի ավարտից հետո պարզ կդառնա, թե ինչպես է ավտորիտար իշխանությունը չարաշահել կարանտինային միջոցառումները՝ օգտագործելով քաղաքական նպատակներով, ընգծել է իսլանդացի զեկուցողը։ Այսպես, Ադրբեջանում կարանտինային ժամանակահատվածում ձերբակալվել են ընդդիմության շուրջ 15 ակտիվիստներ և լրագրողներ:

«Ինձ անհանգստացնում է, որ Ժողովրդական ճակատ կուսակցության առաջնորդ Ալի Քարիմլին դե ֆակտո գտնվում է տնային կալանքի տակ: Մեզ նաև անհանգստացնում է, որ նրա հեռախոսներն ու ինտերնետն արգելափակված են: Մենք ուշադիր հետևում ենք իրավիճակին », - ասաց ԵԽԽՎ ներկայացուցիչը: Ըստ նրա, ԵԽԽՎ համազեկուցողները Ադրբեջանում քաջատեղյակ են իրավիճակին:

«Եվրախորհուրդը տեղյակ է այդ մասին և հետևում է, թե ինչ է տեղի  ունենում։ Համաճարակի ընթացքում խիստ պայմաններում պահվող բանտարկյալներին պահելը անընդունելի է: Ապահով միջավայրում ապրելը բոլոր դատապարտյալների հիմնարար իրավունքն է», - եզրափակեց Էվարսդոտիրը ՝ շեշտելով բոլոր քաղբանտարկյալներին ազատ արձակելու անհրաժեշտությունը: