«Վեոլիա ջուր»-ը տուգանվեց 10 միլիոն ՀՀ դրամի չափով

ՀՀ հանրային ծառայությունները կարգավորող հանձնաժողովը այսօրվա նիստում որոշում կայացրեց «Վեոլիա Ջուր» ընկերությանը տուգանել 10 մլն ՀՀ դրամ գումարի չափով՝ մի շարք խախտումների համար. հայտնում է Yerkir.am-ը:

Ըստ հանձնաժողովի՝ պարզվել են ընկերության կողմից խմելու ջրի մատակարարման և ջրահեռացման կանոններով սահմանված՝ մատակարարի ջրամատակարարման և ջրահեռացման համակարգին դիմող անձի համակարգի միացման համար սահմանված ժամկետների գերազանցման դեպքեր։

Հետևաբար, հանձնաժողովը հարուցել է վարչական վարույթ. արդյունքում փաստվել է՝ «Վեոլիա Ջուր» ընկերությունը 2019 թվականի 3-րդ եռամսյակի ընթացքում մի շարք դեպքերում խախտել է խմելու ջրի մատակարարման և ջրահեռացման (կեղտաջրերի մաքրման) կանոնների 16-րդ կետի պահանջը՝ դիմող անձանց միակողմանի կնքված միացման պայմանագիր կամ տեխնիկական պայմաններ չներկայացնելով կամ ներկայացնելով կանոններով սահմանված ժամկետի խախտմամբ։

Ի վերջո հանձնաժողովը կանոնների 16-րդ կետը խախտելու համար ընկերությանը ենթարկեց տուգանքի` 10 մլն ՀՀ դրամ գումարի չափով։