Ռամիլ Սաֆարովին արտահանձնած Հունգարիան մտադիր է գազ գնել Ադրբեջանից

Հունգարիան մտադիր է 2023 թվականից սկսել ադրբեջանական գազի ներկրումը: Այս մասին Բուդապեշտում կայացած ադրբեջանա-հունգարական միջկառավարական հանձնաժողովի ժամանակ հայտարարել է Հունգարիայի Արտաքին գործերի և առևտրի նախարար Պետեր Սիյարտոն.  հայտնում է Yerkir.am-ը՝ «Ինտերֆաքսի» ադրբեջանական ծառայությանը հղումով:

«Ամենամյա 1-2 մլրդ խմ գազը, որը Հունգարիան կստանա Ադրբեջանից, զգալիորեն կբարձրացնի երկրի էներգետիկ ապաhովությունը: Հունգարիան կկարողանա գազ ներկրել 2023 թվականից», - հայտարարել է Սիյարտոն՝ հավելելով, որ դա հնարավոր կլինի «Հարավային գազային միջանցքի» շնորհիվ, որի շինարարությունը կավարտվի մոտակա օրերին:

Սիյարտոն նաև հայտնել է երկու երկների միջև այլ ներդրումային ծրագրերի մասին:

Հիշեցնենք, որ Հունգարիան 2012 թ. օգոստոսի 31-ին Ադրբեջանին էր արտահանձնել ադրբեջանցի Ռամիլ Սաֆարովին, ով 2004 թ. փետրվարի 19-ին կացնահարել էր հայ սպա Գուրգեն Մարգարյանին: Սաֆարովը դատապարտվել էր ցմահ ազատազրկման, սակայն 2012 թ. նրան արտահանձնեցին Ադրբեջանին, որտեղ անմիջապես համաներում ստացավ, դարձավ հերոս: Այս տխրահռչակ դեպքը մեծ աղմուկ բարձրացրեց ամբողջ աշխարհում՝ քննադատությունների ալիքն ուղղելով հունգարական իշխանություններին, որոնք հանցավոր գործարքի մեջ էին մտել Ադրբեջանի հետ: