Ռամիլ Սաֆարովին արտահանձնած Հունգարիան կօգնի Ադրբեջանին՝ վերականգնել Արցախից գրավված տարածքները

Հունգարիան կօգնի վերականգնել «Ադրբեջանի ազատագրված հողերը». հայտարարել է Հունգարիայի արտաքին գործերի նախարար Պետեր Սիյարտոն:

«Հունգարիան միշտ հանդես է եկել Ադրբեջանի տարածքային ամբողջականության օգտին, և մենք աջակցում ենք հակամարտությունների լուծմանը բանակցությունների միջոցով: Exim Bank-ը 100 միլիոն դոլար վարկային գիծ է բացել հունգարական ընկերությունների համար, որոնք ցանկանում են մասնակցել ադրբեջանական հողերի վերականգնմանը: Բացի այդ՝ Հունգարիայի կառավարությունը 25 հազար եվրո է առաջարկել ականազերծման համար»,- ադրբեջանա-հունգարական տնտեսական կոմիտեի նիստու Սիյարտոյի ասածն է մեջբերում «Ինտերֆաքս»-ի ադրբեջանական ծառայությունը:

Ըստ Սիյարտոյի՝ հունգարական ընկերությունները վերջերս զգալիորեն մեծացրել են իրենց ներկայությունը ադրբեջանական շուկայում. նավթագազային MOL ընկերությունը ռեկորդային ներդրումներ է կատարել երկրում, Wizz Air-ը պատրաստ է վերսկսել թռիչքները դեպի Ադրբեջան, Hell-ին է պատկանում ադրբեջանական շուկայի 25% -ը: