Նաիրա Զոհրաբյանը ԵԽԽՎ-ում հիշեցրել է՝ երբ հրեշ Ռամիլ Սաֆարովին հերոսացնում էին, Վեհաժողովը լուռ էր

Եվրոպայի խորհրդի Խորհրդարանական վեհաժողովի գարնանային նստաշրջանում ՀՀ Ազգային ժողովի «Բարգավաճ Հայաստան» խմբակցության պատգամավոր Նաիրա Զոհրաբյանը ադրբեջանական պատվիրակությանը հիշեցրել է Ադրբեջանի ղեկավարության հայատյացության քարոզների հասին:

Իր ֆեյսբուքյան էջում նա գրել է. «Ստրասբուրգում այսօր քննարկեցինք Եվրոպայում ռասիզմի, քսենոֆոբիայի ու անհանդուրժողականության խնդիրը։ Որքան հիշում եմ՝ այս կառույցում մի հազար անգամ քննարկել ենք, որ ԵԽ անդամ որոշ երկրներում, օրինակ Ադրբեջանում, արմենոֆոբիան պետական քաղաքականություն է, եւ ի պատասխան միշտ եղել է եվրոպական սառը լռություն։ Ես ստիպված էի հիշեցնել նրանց մի դիվանագետի կոչը` ԴՆԹ-ի անալիզի ենթարկել Ադրբեջանի բոլոր դիվանագետներին, որպեսզի, եթե հանկարծ նրանց մեջ հայի կամ այլազգիի արյուն լինի, նրանք չեն կարողանա անշահախնդրորեն ծառայել Ադրբեջանին:

Այսօր կրկին հիշեցրեցի, որ Ադրբեջանի օմբուդսմենը հրեշ Ռամիլ Սաֆարովին համարում էր հայրենասիրության օրինակ յուրաքանչյուր ադրբեջանցու համար ու կրկին Վեհաժողովը լուռ էր։ Նորից հիշեցրեցի, որ ադրբեջանական դասագրքերը էդ երեխաներից հայատյաց մարդասպաններ են բուծում ու կրկին մեր Վեհաժողովը լուռ էր։ 

Եվ ուրեմն՝ ինչո՞ւ պիտի ռասիզմն ու այլատյացությունը Եվրոպայում իր շքահանդեսը չտոնի, եթե միջազգային այն կառույցները, որ պիտի արձագանքեն ատելության եւ ռասիզմի ցանկացած դրսեւորման՝ մեկը մյուսի հետեւից մեռելածին բանաձեւեր են ընունում։