Էրդողանը ուլտիմատում է ներկայացրել Ասադին

Եթե մինչև փետրվարի վերջ Բաշար Ասադի ռեժիմի ուժերը չնահանջեն Իդլիբի ապաէսկալացիայի շրջանում Թուրքիայի ԶՈւ-ի դիտարկման կետերից, Թուրքիան ստիպված կլինի դա անել սեփական ուժերով: Այս մասին, ըստ Yerkir.am-ի, հայտարարել է Թուրքիայի նախագահ Ռեջեփ Թայիփ Էրդողանը՝ Անկարայում չորեքշաբթի օրը իր ղեկավարած Արդարություն և զարգացում կուսակցության խորհրդարանական խմբակցության նիստի ժամանակ:

Ըստ Էրդողանի՝ Սիրիայի վերաբերյալ ձեռք բերված համաձայնությունը անտեսվում է. «Իդիբում թուրք զինծառայողների վրա կրակելը Անկարայի համար դարձավ նոր շրջափուլ Սիրիայում ընթացող գործընթացներում: Այնպես, ինչպես Ասադի ռեժիմն  է պատասխանում ընդդիմության կողմից իրականացվող մանր խախտումներին, այդպես էլ Թուրքիան է պատասխանելու սիրիական բանակի խախտումներին», - նշում է Էրդողանը:

Էրդողանն ընդգծեց, որ Թուրքիան Սիրիայում ռազմական օպերացիաները անկացնում է հենվելով 1998 թ. Ադանայի համաձայնագրի դրույթների վրա:

«Թուրքիայի օդուժն ու ցամաքային ուժերն, ըստ անհրաժեշտության ազատ առաջ կշարժվեն ու կօգտագործեն երեք ռազմական գործողությունների շրջանի օդային տարածքը», - նշեց Էրդողանը՝ հավելելով, որ յուրաքանչյուր ոք, ով կասկածի տակ է դնում Թուրքիայի ներկայությունը Սիրիայում, Թուրքիայի և թուրք ժողովրդի թշնամին է:

Միակ բանը, որ Թուրքիան ակնկալում է Ռուսաստանից, ըստ Էրդողանի, Անկարայի՝ սիրիական հարցում զգայունությունը հասկանալն է: