Առաջարկում է Ասադին հանձնել Հաագայի դատարանին

ՄԱԿ-ը պետք է դիտարկի Սիրիայի նախագահ Բաշար ալ Ասադին Միջազգային քրեական դատարանին հանձնելու հարցը. այսօր նման նախաձեռնությամբ է հանդես եկել Ավստրալիայի արտգործնախարար Քեւին Ռուդը:

Նա ասել է, որ իր երկիրն արդեն ընդլայնել է Սիրիայի դեմ կիրառվող պատժամիջոցները, բացի այդ` մտադիր է լրացուցիչ իրավական քայլեր քննարկել ՄԱԿ-ի գլխավոր քարտուղար Պան Գի Մունի հետ:

Ռուդի մեկնաբանությունները հնչել են այն բանից հետո, երբ ԱՄՆ պետքարտուղար Հիլարի Քլինթոնը հայտարարել է, որ կտտանքները, որոնց ենթարկվել է 13-ամյա սիրիացի տղան (նրա դիակը փողոց էին գցել), ցույց է տալիս սիրիական իշխանությունների` ցուցարարների պահանջները եւ սեփական խոստումները կատարելու լիակատար անկարողությունը:

«Երբ տեսնեք սիրիական կառավարության լայնամասշտաբ գործողությունները` ուղղված սեփական քաղաքացիական բնակչության դեմ, այդ թվում` երեխայի կտտանքներն ու սպանությունը, բնականաբար, այդ վարչակարգի լեգիտիմության հարցը կծագի»,- հայտարարել է Ավստրալիայի արտգործնախարարը: