Պոլսում բացվել է Կոմիտասի հուշարձանը

Պոլսի Հայոց պատրիարքարանի բակում բացվել է հայ մեծ երգահան, մանկավարժ և խմբավար Կոմիտասի հուշարձանը: Այս մասին, ըստ Yerkir.am-ի, հայտնում է Arevelk.am կայքը:

Հուշարձանի բացումը կատարվել է պատրիարքական տեղապահ Սահակ եպիսկոպոս Մաշալյանի հովանու ներքո, իսկ հովանավորը Սարգիս Քյուլեքեչն է:

Կոմիտասի հուշարձանի հեինակը պոլսահայ քանդակագործ Էրոլ Սարաֆյանն է, որը հուշարձանի բացման ժամանակ խոսել է Կոմիտասի դերի  և կատարած աշխատանքի մասին:

Թուրքիայի ներկայից Քյութահյա քաղաքում ծնված Կոմիտասի արձանը պատրաստվել և կանգնեցվել է նրա ծննդյան 150-ամյակի առթիվ: Իր կյանքի որոշ շրջանում Կոմիտասը գործել է Պոլսում, ստեղծել «Գուսան» հանրահայտ երգչախումբը, մեծ դեր ունեցել պոլսահայության կյանքում: