Կ.Պոլսում կկազմակերպվեն Կոմիտասի 150-ամյակին նվիրված համերգ, ցուցահանդես և գրքի շնորհանդես

Սույն թվականի հոկտեմբերի 7-ին Կ․Պոլսի (Ստամբուլ) «Ջեմալ Ռեշիդ Ռեյ» համերգասրահում կանցկացվի համերգ՝  նվիրված Կոմիտասի 150-ամյակին։ Այդ մասին հաղորդում է  Kulturservisi.com լրատվամիջոցը։

Աղբյուրի հաղորդմամբ՝ համերգի կազմակերպիչներն են «Անադոլու Քյուլթյուր» հասարակական կազմակերպությունը, «Քալան Մյուզիք» ընկերությունը և «Մաքսիմ Գորկի» անունը կրող թատրոնը։

«Լուսաշող արևածագի ձայնը. Կոմիտասի 150-ամյակը» խորագրով միջոցառման մասին հրապարակմամբ հանդես եկած թուրքական լրատվամիջոցը համառոտ կերպով անդրադառնում է նաև Կոմիտասի կյանքին՝ չմոռանալով վերջում ընդգծել, որ Կոմիտասը նաև Հայոց ցեղասպանության ականատեսն է եղել։

Նախքան համերգը տեղի կունենա դարձյալ Կոմիտասին նվիրված, ցուցահանդեսի բացումը, որի կազմակերպիչն է «Բիրզամանլար» հրատարակչությունը։ Նույն միջոցառման շրջանակներում կկայանա նաև «Խենթության հնագիտությունը՝ Կոմիտաս․ մի հայ սրբի դիմանկարը» գրքի շնորհանդեսը։

Թարգմանեց Մելինե Անումյանը

Akunq.net