Ճիշտն ասելն այն է, ինչ ես կարող եմ. Օրհան Փամուքը՝ Հայոց ցեղասպանության թեմայի մասին

Թուրք հայտնի գրող, Նոբելյան մրցանակի դափնեկիր Օրհան Փամուքը մասնակցել է ԱՄԷ-ի Շարջա քաղաքում անցկացվող գրքի տոնավաճառին: Թուրք գրողն աչքի է ընկնում ոչ միայն իր աշխարհիկ աշխարհընկալմամբ, այլև Էրդողանի քաղաքականության քննադատությամբ և Հայոց ցեղասպանության ճանաչման բացահայտ կոչերով. հաղորդում է mk.ru կայքը:

«Ես ապրում եմ աշխարհի մի անկյունում, որտեղ շատ գրողներ բանտում են իրենց քաղաքական հայացքների համար: Այնպես որ՝ ես երջանիկ գրող եմ, և ճիշտն ասելն այն է, ինչ ես կարող եմ»,- ասել է Փամուքը՝ անդրադառնալով իր քաղաքական հայացքներին:

Հիշեցնենք, որ 2005 թ. Փամուքը շվեյցարական Das Magazin պարբերականին տված հարցազրույցում հայտարարել էր. «Թուրքիայում սպանվել է 300 հազար քուրդ և 1 մլն հայ: Դրա մասին ոչ ոք չի խոսում, և ինձ ատում են այն բանի համար, որ ես ասում եմ սա»: Այս հայտարարությունից հետո Փամուքը ստիպված էր լքել Թուրքիան: Նրա նկատմամբ հարուցվեց քրեական գործ՝ Թուրքիայի Քրեական օրենսգրքի տխրահռչակ 301-րդ հոդվածի հիման վրա՝ թուրք ազգի ինքնությունը վիրավորելու մեղադրանքով, Փամուքը ենթարկվեց ազգայնականների սպառնալիքներին: «Այն, ինչ եղել է օսմանյան հայերի հետ 1915 թ., ամենամեծ գաղտնիքն է՝ թաքցված թուրք ազգի կողմից. այդ դեպքը տաբու է: Բայց այժմ մենք պետք է ի վիճակի լինենք խոսել անցյալի մասին»,– նշել էր թուրք գրողը BBC-ին տված հարցազրույցում:

Ի պաշտպանություն Փամուքի՝ 8 աշխարահռչակ գրողներ՝ Գաբրիել Գարսիա Մարկեսը, Ժոզե Սարամագուն, Գյունտեր Գրասը, Ումբերտո Էկոն, Կառլոս Ֆուենտեսը, Խուան Գոյտիսոլոն, Ջոն Ափդեյքը և Մարիո Վարգաս Լյոսան հանդես եկան համատեղ հայտարարությամբ: 2011 թ. Ստամբուլի դատարանը փոխարինեց հետապնդումը՝ պատիժ սահմանելով 3800 դոլար տուգանքով: