Ճիշտն ասած, ուզում էի ծաղիկներով գալ. Տիգրան Առաքելյանը` դատավորին

ՀՀ վերաքննիչ դատարանում տեղի ունեցավ ՀԱԿ 4 ակտիվիստների դատավարությունը:

Մինչեւ դատական նիստի մեկնարկը Տիգրան Առաքելյանը լրագրողների հետ զրույցում նշեց, որ իրեն լավ է զգում, այս ամենին լուրջ չի վերաբերվում, քանի որ ամեն ինչ ի սկզբանե շոու է եղել: Նա նշեց, որ իրենց փոխարեն նստած պետք է լինեին ոստիկանները, իսկ իրենք` որպես վկա, պետք է լինեին դատարանի դահլիճում:

Դատարանում այսուհետ ՀԱԿ ակտիվիստների շահերը կպաշտպանի Մուշեղ Շուշանյանը, ով հանդես եկավ միջնորդությամբ՝ դատարանից խնդրելով փոխել Տիգրան Առաքելյանի խափանման միջոցը` կալանքը, եւ նրան ազատ արձակել: Միջնորդությունը, սակայն, մերժեց, խափանման միջոցը մնաց նույնը:

«Այնքան ուրախացել էի, երբ իմացել էի, որ հայ կին է քննելու գործը: Ճիշտն ասած` ուզում էի ծաղիկներով գալ: Մենք շատ ճիշտ ենք անում, որ հայ կնոջ մոր տեսակը պահպանելու համար պայքարում ենք, ամեն ինչ անում ենք, որ դուք կապված չլինեք որեւէ հանգամանքից: Ես ամեն դեպքում դեռ հիասթափված չեմ»,- միջնորդությունը մերժելուց հետո հայտարարեց Տիգրան Առաքելյանը:

Նշենք, որ մինչ ընթանում էր դատավարությունը, դրսում՝ դատարանի առջեւ, ի պաշտպանություն ՀԱԿ ակտիվիստների, բողոքի ակցիա են իրականացնում տասնյակ քաղաքացիներ: