ՏԵՍԱՆՅՈՒԹ․ Սահմանամերձ Այգեհովտում բացվել է ապաստարան դպրոցականների և մանկահասակ երեխաների համար

Տավուշում արդեն  իններորդ  ապաստարանն է բացվել՝ Այգեհովիտ  համայնքում. Yerkir.am-ի հետ հարցազրույցում ասաց Տավուշի մարզում դրանց  կառուցմամբ և վերակառուցմամբ զբաղվող «Պահապան»  հիմնադրամի գործադիր տնօրեն Ինգա Հարությունյանը։

Այգեհովտի ապաստարանի վերանորոգումն ու կահավորումն ավարտված է։ Այն նախատեսված է որպես պատերազմական և հատուկ իրավիճակներում մանկահասակ ու դպրոցահասակ երեխաների, պատանիների և նրանց ուսուցիչների ապահով թաքստոց:

Ապաստարանների կառուցումը, վերակառուցումն ու վերանորոգումն առաջին անհրաժեշտության գործողություն է պատերազմական իրավիճակում գտնվող և հատկապես սահմանամերձ բնակավայրերի համար:

Տավուշի սահմանը պահող Այգեհովիտ գյուղի  ապաստարանը վերանորոգված է ժամանակակից միջազգային ստանդարտներին համապատասխանող  բոլոր չափորոշիչներով, ունի օդափոխության և ջեռուցման նորացված համակարգ, երկրորդ մուտք և  ադրբեջանական ռազմական  ոտնձգությունների դեպքում կարող է լիարժեք կերպով  ապահովել  այգեձորցի ավելի քան 376 մանուկների և պատանիների անվտանգությունը, որոնք ապրում և սովորում են մշտական կրակոցների պայմաններում։  

«Պահապան»  հիմնադրամը հանձն է առել վերանորոգել և  կահավորել Տավուշի մարզի սահմանամերձ՝ առավել խոցելի  23  համայնքների  15 ապաստարաններ. ինն  արդեն պատրաստ և  հանձնված է,  իսկ ամենամոտ ապագայում տեղի կունենա ևս մի քանի  բարեկարգված  ապաստարանի հանձնման արարողություն:   

Թաքստոցների անհրաժեշտության, չափանիշների և օգտագործման նրբությունների մասին Ինգա Հարությունյանի պատմած մանրամասները՝ տեսանյութում:

Նվարդ Մանվելյան