Նեթանյահուի ձախողումից հետո Իսրայելի նախագահը Բենի Գանցին է հանձնարարել նոր կառավարություն կազմել

Իսրայելի նախագահ Ռեուվեն Ռիվլինն ընդդիմադիր «Կապույտ և սպիտակ» կուսակցության ղեկավար Բենի Գանցին հանձնարարել է կոալիցիոն կառավարություն կազմել. հայտնում է Ruptly լրատվական գործակալությունը:

Նույն առաքելությունն ավելի վաղ հանձնարարվել էր նաև գործող վարչապետ Բինյամին Նեթանյահուին, սակայն դա նրան չէր հաջողվել:

Նշվում է, որ Բենի Գանցը կոալիցիա կազմելու համար ունի 28 օր ժամանակ:

Իսրայելի նախագահ Ռիվլինը կոչ է արել ամեն գնով կառավարություն կազմել՝  ևս մեկ ընտրությունից խուսափելու համար, որի տեղի ունենալու դեպքում կլինի այս տարվա մեջ արդեն երրորդը:

Հիշեցնենք, որ սեպտեմբերին անցկացված ընտրությունների արդյունքներով Նեթանյահուի կուսակցությունը Կնեսետում ստացել էր 32 մանդատ, իսկ Գանցի կուսակցությունը՝ 31: