Իրանի Կենտրոնական բանկի դեմ ԱՄՆ-ի նոր պատժամիջոցները վկայում են ամերիկացիների հուսահատության մասին. Զարիֆ

Իրանի Կենտրոնական բանկի դեմ ԱՄՆ-ի նոր պատժամիջոցները վկայում են ամերիկացիների հուսահատության մասին: Այս մասին հայտարարություն է տարածել Իրանի ԱԳ նախարար Մոհամադ Ջավադ Զարիֆը, հայտնում է korrespondent.ru-ն` հղում անելով IRIB կորպորացիայի հաղորդագրությանը:

«ԱՄՆ-ն ցանկանում է Իրանի բնակչությանը զրկել սնունդ և դեղամիջոց ձեռք բերելու հնարավորությունից: Այդ փաստն ակնհայտորեն միջազգային պարտավորությունների խախտում է»,- հայտարարել է Զարիֆը:

Զարիֆը հիշեցրել է, որ ԱՄՆ-ն իրանի Կենտրոնական բանկի հանդեպ նախկինում արդեն իսկ պատժամիջոցներ սահմանել էր, իսկ հիմա այդ կառույցի հանդեպ նորից է սահմանափակումներ կիրառում: Արտաքին քաղաքական գերատեսչության ղեկավարը ավելացրել է, որ Իրանի Կենտրոնական բանկի դեմ ԱՄՆ պատժամիջոցներն ամերկացիների հուսահատության մասին են վկայում։

Նախարարը նաև մանրամասնել է, որ ամերիկացիները երբեք հավատարիմ չեն եղել միջազգային համաձայնագրերին և դրանք մեկնաբանել են միայն իրենց ազգային շահերի տեսանկյունից:

«Այս քայլը մի կողմից ապացուցում է, որ Վաշինգտոնը չի կատարում ստանձնած միջազգային պարտավորությունները, մյուս կողմից էլ ԱՄՆ-ի այս քայլն ազդանշան է հանդիսանում այն մասին, որ ԱՄՆ-ի պատժամիջոցների քաղաքականությունն արդեն իրեն սպառել է»,- ասել է Զարիֆը: