ԱՄՆ պատժամիջոցները խոչընդոտում են թմրամիջոցների դեմ պայքարի գործում միջազգային համագործակցությանը. Զարիֆ

ԱՄՆ պատժամիջոցները խոչընդոտում են թմրամիջոցների դեմ պայքարի գործում միջազգային համագործակցությանը: Այս մասին այսօր թմրանյութերի դեմ պայքարի միջազգային օրվա առիթով կազմակերպված խորհրդաժողովում հայտարարել է Իրանի ԱԳ նախարար Մոհամադ Ջավադ Զարիֆը. տեղեկացնում է ԻՌՆԱ-ն:

«Պատժամիջոցների կիրառումը, ԱՄՆ միակողմանի գործողությունները եւ Իրանի ժողովրդի դեմ ծավալված տնտեսական պատերազմն ու ահաբեկչությունը խոչընդոտում են միջազգային համագործակցությանը, հատկապես՝ թմրամիջոցների դեմ պայքարի գործում»,- ասել է Իրանի արտաքին քաղաքական գերատեսչության ղեկավարը՝ հավելելով, որ ԱՄՆ-ը եւ արեւմտյան մի շարք այլ երկրներ անմիջական պատասխանատվություն են կրում թմրանյութերի դեմ պայքարում միջազգային համագործակցության խոչընդոտման անցանկալի հետեւանքների համար:

Ըստ նրա՝ Իրանի Իսլամական Հանրապետությունը կարծում է, որ թմրամիջոցների դեմ պայքարի գործում անհրաժեշտ է կենտրոնանալ միջազգային համագործակցության վրա՝ այն զերծ պահելով քաղաքական անհարկի շահարկումներից եւ միակողմանի գործողություններից: