Georgian Airways-ը 25 մլն դոլարի վնաս է կրել դեպի Ռուսաստան չվերթերի չեղարկման պատճառով

Դեպի ՌԴ վրացական Georgian Airways  ավիաընկերության չվերթերի չեղարկման հետեւանքով վնասի չափը կազմել է շուրջ 25 մլն դոլար. այսօր հայտարարել է ավիափոխադրողը: Հայտարարության մեջ նշվում է,  որ ուղիղ չվերթերի չեղարկումը զգալի հարված է հասցրել ավիաընկերությանը, որը կանգնած է լուրջ ֆինանսական խնդիրների առջև: Վաճառված տոմսերի մոտ 80 տոկոսը վերադարձվել է, իսկ տոմս գնողների թիվը` կտրուկ ընկել:

Վրացական ավիաուղիների ղեկավարությունը հայտարարության մեջ նաեւ անդրադարձել է երկրի կառավարության` վերջերս կայացրած որոշմանը` խթանել Ռուսաստանի եւ Վրաստանի միջեւ Երեւանով տարանցիկ չվերթերի իրականացումը եւ  այդ կապակցությամբ հատկացնել 600 հազար եվրո: